用得耐Instagram，你會發現咗好多奇怪現象，同埋好多奇怪嘅Ig用戶，指嘅已經唔再係啲人post相呃Like、圖文不符咁簡單，睇下你身邊有冇以下幾種人。
第1種人 極度執著自己Ig嘅style
依家Ig上面個個人都可以係攝影師，每張相都影到pro一pro，重點係成個Ig上面嘅相都要保留同1種style，或者用同1款filter，咁成個Ig睇上去就會好有格調，自然followers同like都多啲啦。如果有張舊相同成個Ig嘅風格有出入，仲會delete咗佢添。其實不得不佩服佢哋嘅堅持，要每日都執相，或者將相機入面嘅相放入電腦，再輾轉upload上Ig，都係1件花時間嘅事。
第2種人 煩膠Ig shop
當你以為自己有好多followers follow你嘅時候，一打開follower list你會發現，其實大部分都係Ig shop為咗宣傳自己間鋪，佢地會喺同類型對手個Ig嘅followers list上面，搵啲潛質客仔嚟follow，仲有瘋狂like其他人嘅相博曝光率，呢啲都係佢哋嘅求生方法。你會話搵啖飯食姐大佬啊，不過你會發現Ig shop嚟嚟去去都係嗰幾味，再唔係將啲淘寶貨賣貴啲同埋做代購，最重要係偷張靚仔少少嘅相嚟post，當然都有啲有heart嘅人。好多人見到人賺錢佢就去做，冇乜新意同誠意，就算俾你逼到我禁入去睇你個Ig，但係打動唔到我地又點follow你啊？
第3種人 唔知tag嚟做咩嘅Hashtag
有時候小編望住啲hashtag，心諗做乜嘢姐你？有好多Hashtag tag嚟唔知為咩，例如#hkig、#hkiger、#igdaily、#TagForLike、#852、#hkgirl、#hkboy，鬼唔知你係Ig user，或者男定女咩。小編都有諗過咁做係咪曝光率會高啲，可以吸引多啲followers like自己嘅相，但其實每秒都有人用緊呢個Hashtag，你張相一早沉晒底啦。
第4種人 Hashtag仲長過句Caption
依家係睇你句Caption定Hashtag姐？好多人都會將原本要打嘅Caption，變晒做Hashtag，長到成個藍海咁，斷開晒一句句，唔講仲以為「#」係句句子嘅標點符號。其實小編都係無病呻吟姐，無咩嘅。
第5種人 瘋狂洗版
你Ig上面總會有幾個朋友，好鍾意瘋狂post相去洗你版，尤其是依家好興將1張相cut開幾part，當你禁返入去佢個Ig，就會見到1張完整嘅相，其實都幾無謂。
第6種人 你都係想人地Like/Follow返你姐
有時候自己嘅相會有陌生人Like，但佢又唔係你嘅Followers，禁入去佢個Ig睇下，發現佢都幾多followers㗎啵，但係三唔識七，無非都係想人Like或者Follow返你姐，係咪？其實你可以乾脆啲學人留言一句：親，一起互粉互贊！
第7種人 買Followers買Like
可能大家都聽過喺淘寶可以買Followers同買Likes，仲會有啲Ig shop專做呢啲生意，平平地幾十蚊就可以買到百個Followers，佢地仲標榜只做真人粉絲，但係人都知道嗰啲Account睇落假到不得了，搵張街外圖做Profile Picture，再upload幾個posts，會唔會假咗啲？有時當你Ig上面有朋友個Post先出咗幾秒，就有幾十個Like，好可能佢已經買左Likes同Followers，你八卦啲禁入去睇下Like嘅係咩人就知道。當然明星另計，但係就算買咗你都唔知㗎啦。其實幾個Like同Followers係咪真係咁重要啊？好似真係好重要。
第8種人 Stalk人Ig又唔敢Follow
有1種怪人係鍾意Stalk你Ig，但係又唔敢Follow你。但係你好地地又點會知道有Stalker長期睇你Ig呢？就係有時佢地睇你張相嘅時候，會唔小心Like左你張相再Unlike返，但你手機都會照彈個通知出嚟話你知佢like咗。小編試過有次發現自己個Ex嘅現任女朋友stalk自己嘅Ig，仲唔小心Like咗再unlike。其實你Stalk得又唔敢follow嘅人，通常都係得你嘅Ex，或者你男朋友嘅Ex，仲有你嘅敵人同男神、女神。
第9種人 普通人有好多Followers
有時你會唔明白點解有啲普通人，又唔係明星，又唔係特別標青，都會有好多Follwers，而且通常佢地follow其他人嘅人數都會特別少，形成追踪者同追踪中嘅人數反差，咁樣好似會特別威水啲。小編有懷疑過佢哋係咪亂咁follow人，引人Follow返佢，之後再Unfollow返自己嘅followers，哇媽啊！聽落都好複雜、好攻心計啊。
第10種人 成個私家偵探咁嘅終極Stalker
喺Ig可以睇到好友動向，無論人地like咗咩相，或者喺邊度留過言，Follow咗咩人，你都可以一覽無遺。有1種人好鍾意長期監察住好友動向，有啲女仔仲會留意住佢男朋友會唔會Like其他女女嘅相，直頭成個私家偵探咁，真係好恐怖。
