15個令打工仔崩潰嘅公司規矩

公司有公司規矩,定出嚟總有原因,但合唔合理就見人見智啦。老細多數都覺得自已諗出嚟嘅規矩有根有據,一定可以提高員工效率,公司業務實蒸蒸日上乜乜乜。作為打工妹/ 打工仔嘅你,無權無勢又遇著個唔肯聽意見嘅老闆,除咗遞信辭職打西家之外,你唯一可以做嘅咪硬食囉。香港地做嘢,個個都有奴性,遇著以下15條令人崩潰嘅公司規矩,你最多都係呻1下,跟住咪又係照做。你話係咪好令人崩潰先?

dagong1

1. 每次去廁所唔可以超過X分鐘
之前網上都瘋傳咗張員工守則,每日只可以去廁所4次,夾埋仲唔可以超過15分鐘。求神拜佛唔好食錯嘢搞到個肚唔舒服啊,唔係你幫自己包片算啦。

dagong2

2. 有限度上網
即係有啲網會Block咗唔俾上,好似Facebook啊、YouTube咁,怕你掛住上網疏忽職守。都唔係唔啱嘅,你臨瞓前睇Facebook都成日碌碌下碌咗成個鐘啦,公司咁多嘢等你做,邊有咁多時間俾你碌先?只不過喺唔睇新聞,齋靠Facebook了解世界嘅年代,會唔係幾方便囉。

dagong3

3. 遲到要扣錢
小編聽過有啲公司Policy係遲到1分鐘扣1蚊,如果遲到唔合理,責任制嚟講扣錢都好正常。但有啲朋友家住新界西,朝朝要過海返工,已經預2個鐘頭搭車但都撞正巴士塞車、港鐵延誤,又點睇?

dagong4

4. 放工或放假都要即刻覆Message
哩點相信大家都唔陌生,有網友仲話加入咗Whatsapp Group之後就冇咗放工時間。入得Whatsapp Group,即係你同老細嘅距離拉近咗啦,咁佢諗到新Idea,即刻想你「幫手」跟跟,你有冇理由托手踭?冇囉!你唔應?老細第2日就問你:「我見你On過line, 做乜當我冇到?」

dagong5

5. 建議你放棄興趣,將工作放喺第1位
一心唔能夠二用,放咁多時間行街睇戲畫畫唱歌做手工,不如襯後生專心工作先?就咁聽又好似好有道理喎!但星期一至日都對住公司嘢,除非你極鍾意你份工,如果唔係有乜可能唔崩潰?

dagong7

6. 指定衣著打扮
要俾個好印象服務對象,專業啲斯文啲無可厚非。但點解唔駛見客都規定要化濃妝仲唔俾著波鞋?又或者著西裝點解一定要著埋外套?想大家統一衣著打扮點解唔整制服算?

dagong8

7. 返工時間要熄電話
原因都係想大家工作期間不受影響啦,雖則員工們都唔希望有咩突發嘢要聽電話,但意外意外,意料之外吖嘛,萬一真係有乜事咁邊個負責先?係咪老細你負責呀?唔係唔係,Sorry,我自己負責返。

dagong9

8. 唔准佈置工作檯
打工仔/打工妹留喺公司嘅時間仲多過喺屋企,想話好好佈置吓個位等自己返工開心啲。老細就覺得整齊好重要,工作檯最好連Memo紙都冇,乖乖哋放工嗰陣擺返晒啲水杯日曆去Locker啦。

dagong10

9. 唔俾傾偈
1個安靜嘅環境先可以令員工專心完成手頭工作(好似係),所以最好就唔好傾偈啦。你會話:「老細,傾公事咋!」冇㗎,老細分唔到公私事㗎,分到佢就唔會用私人時間搵你做公務啦係咪咁講啊?

dagong11

10. 明明個個都係香港人,內部E-mail都唔俾用中文
咩呀香港國際大都會嚟㗎,我哋又係國際公司,俾機會員工多啲有英文有乜唔啱?啱嘅,但老細我嘅母語始終唔係英文,你唔介意我用些少Konglish或者會錯Grammar就得㗎喇!
source: http://www.popd.hk/

dagong12

11. 要不定期同上司一齊食飯,了解工作進度
呃⋯⋯老細食件雞吖,個Project而家呢就咁咁咁。(嘩,小編齋諗到個畫面都已經好尷尬)

dagong13

12. 開會一定要最少講1次嘢
我同意B同事嘅講法。同事A你覺得呢?經歷完公開考試都仲有小組Oral環節,好崩潰啊!

dagong14

13. 喺公司範圍唔俾講粗口
可能就要睇你做邊行喇,小編哩啲做傳媒行業呢就點都有幾句旁身,但亦有聽聞做教育版嘅同行因為成日要同校長、學者等人見面,所以係1句粗口都唔講得,一講即炒。Bye Bye。

dagong14

14. 彩色影印(就算只得1張)都要老細批准簽咗名先俾印
小公司資源有限,適當地開源節流好正常。但1張彩色影印都要問准老細,似乎就煩咗啲。老細日理萬機,等佢簽名分分鐘等到2046,小員工可以點?一係唔印,一係就屋企印完拎返公司囉⋯⋯

dagong15

15. 買公家嘢一定要用現金俾,用八達通或者信用卡就冇得Claim錢
比較多出現喺教育界,做老師嘅Sizz可能會有多啲共鳴。好似話係因為教育局批公帑,所以唔容許電子貨幣交易,費事又要顧埋啲積分咁話。

係咪愈睇愈不解?但唔好笑啊,真係有人經歷緊!以上規則可能只係冰山一角,更離譜嘅都有,只係未有人提出咁解。咁打工嘅你,可以點做呢?反映囉!如果反映完都冇用呢?唔⋯⋯小編都唔知,你覺得呢?