19002
19002
六月 16,2016

因為愛 所以愛

becauselovehottofu

愛情其實可以簡簡單單,兩個人拍拖相處得開心就足夠。

 

我同女朋友拍拖嘅活動真係好簡單隨意,

可能周圍行下街、食下嘢咁樣又一日。

但女朋友好奇怪,唔知佢係無乜安全感定係屎忽太痕,成日突擊考我…

 

有次佢食緊雪糕,行行下街無啦啦叫我錫佢

「你而家錫我!」

 

做咩啫佢…

 

我見到佢成嘴都係白色嘅雪糕漬,我有啲卻步

「吓….好多人喎條街」

「我唔理呀!」

佢就係咁無啦啦停咗喺條街到,

喺呢個左穿右插嘅人群之中,我望唔透。

 

你就想睇死我唔敢錫咋嘛!

好!

 

我就唔敢!

話畢,我就攞張紙巾出嚟幫佢抹咗嘴上嘅雪糕

「睇下你,食到幾污糟」

之後再錫佢一啖補番數,

我用勝利嘅眼光望住佢。

 

無錯,我贏!

 

就係咁低B無聊,都可以玩一餐。

不過唔好以為咁就完,女朋友既「考驗」仲一步步嚟緊。

 

有一次夏天同佢喺郊區周圍行下,無啦啦佢笑笑口問,

「點解你會鍾意我嘅」

我望住佢咁奸嘅笑樣,

就知道佢又嚟啦…又想試我啦。

 

「你靚囉~」

之後佢就一嘢拍落嚟

「喂!又喺到hea我」

「哈!你都唔信呢~」

可能佢都知自己唔靚(好似係)

 

「快啲講啦!」

「因為當初我見到你,個次大家臉貼得超近嘅時候,我忍唔住好想錫落去!」

之後佢瞪大隻眼望住我

「變態!」

「係㗎,我成日都想錫你㗎啦!瞓醒嗰陣想錫、攬住你嗰陣想錫、你挨喺我身邊嗰陣想錫」

一路講,一路見住佢嘴角向上揚,

其實佢不知幾開心係到暗爽。

 

其實情侶間嘅開心,有時只係好簡單幾個動作、幾個行為就已經足夠。

我地兩個就係咁成日打打鬧鬧,希望可以打足一世。

 

或者外人聽落咁樣拍拖好辛苦,次次都比個女仔食住,又咩過關考驗,真係人都癲。

但其實女朋友又點會真係每次都咁辛苦去試你、考你…

講咁多,都只係想聽下你嘅甜言蜜語啫。

 

呢一種可能就係人地講嘅小情趣,

其實玩咩、講咩都好,最緊要都係對方受落,你情我願。

 

愛情其實可以簡簡單單,兩個人拍拖相處得開心就夠。

如果你真係要我講原因,我只可以好老套講一句,

「因為愛,所以愛」