18795
18795
六月 07,2016

同女友行街

shoppingwithgf

如果你以為我會寫同女朋友行街幾可憐幾慘,你就錯啦!

其實對男人嚟講,同女朋友行街,有時係一種好好嘅舒壓活動。

無論你個日有咩煩惱,心情有幾唔好。當你同女朋友漫無目的係街上閒逛,好自然會將所有唔開心野擺埋一邊。

聽佢講下無聊嘢,聽佢鬧下邊個八婆幾咁八婆。其實佢講咩唔係最重要,去邊都唔緊要,只要有佢喺你身邊一齊行,你就會覺得好放鬆好舒服。

 

好多人以為女人先需要男人俾安全感佢地,其實男人都好需要安全感。

而同女朋友行街正正可以令男人得到呢種「安全感」。因為只有當你同女朋友行街嘅時候,你會知道係嗰一刻,可以咩都唔洗理,放低一切凡塵雜務,只需全心全意陪自己心愛既人穿梭大街小巷。

 

男人行街同女人行街好唔同,女人行街可以行兩三個鐘唔知買咩(或者咩都想買)。

男人行街喺出門口之前已經好清楚自己要買咩,求其換件衫搭車出旺角信和買完坐番返車返屋企,加埋都唔洗半個鐘。

彷彿女人天生就鐘意行街,就算明知自己糧尾無錢買嘢,佢地都會想睇下過下心癮。

 

女人行街,重點係行。好似變返三歲細路女,見到咩都開心大發現咁。你好少見到兩個麻甩佬會因為見到一個新出嘅得意手機殼而咿嘩鬼叫跑去人地店鋪門口。

但女朋友就算見到無聊嘢都開心一餐,見到佢咁開心,潛移默化之下你都會好自然被佢影響,連你都開心埋一份。

最後你陪佢行街,唔只係為咗佢開心,反而係佢令到你開心返。

柳臣曾經以為情侶要氹對方開心一定要花好多心機,精心設計做曬棟篤笑又或者山長水遠睇紅葉落霞。但原來只要佢喺你身邊,就已經會令你開心。

 

另一樣陪女朋友行街嘅必經階段,就係發掘你嘅潛能。平時作為死毒宅廢青既你,一同女朋友出街,就會發現自己係幾咁多才多藝。

因為你除咗係「自動揹袋拎嘢機」之外,仲係「得意嘢偵探」,以及「防走光防撞車人肉氣墊」,同埋「人肉導盲GPS」外加『「件衫著得你好靚啊」評論員』。

必要時,你仲要做埋佢嘅「獨家政治評論員、科學解說員、爛GAG王、手機及其充電器保管員」等等等等,真係七十二變都唔止。

同女朋友一齊越耐,你可能會開始覺得煩厭,甚至感情會變淡。好正常。因為你已經漸漸忘記咗嗰種同女朋友一齊行街嘅療癒感覺。


作者:柳臣

Facebook:https://www.facebook.com/柳臣-802134759816720/